La conseyera de Bienestar Social y Vivienda del Principáu, Esther Díaz, considera que la reforma de la Llei de Servicios Sociales va dotar a Asturies d’una de les normes más avanzaes d’España. Asina lo treslladó al presidente del Comité Español de Representantes de Persones con Discapacidá (CERMI) estatal, Luis Cayo Pérez, a quien dio a conocer el proyectu ellaboráu pol Executivu asturianu nuna xunta celebrada güei, a la qu’asistieron tamién el director xeneral de Polítiques Sociales, Enrique Rodríguez Nuño, y responsables de Cermi Asturies.
Díaz afirmó que la reforma va dexar alcordar servicios y programes ente’l Principáu y les entidaes d’iniciativa social, lo que va reforzar la relación ente l’Alministración autonómica y les entidaes ensin ánimu d’arriquecimientu. El testu recueye tamién la posibilidá d’establecer convenios col tercer sector pa realizar actividaes de calter innovador y actuar en casos d’urxencia. La responsable de Bienestar Social destacó la coincidencia colos representantes del Cermi sobre la meyora qu’esta reforma supon pa les polítiques sociales.
La conseyera anunció tamién que’l Gobiernu asturianu va aprobar llueu’l Plan d’Actuación Integral pa les Persones con Discapacidá d’Asturies 2014-2016, un documentu de diagnosis y propuestes p’ameyorar la situación d’esti colectivu ciudadanu. El plan cunta con aportaciones de les conseyeríes de Bienestar Social y Vivienda, Sanidá, Educación y Economía y Empléu, lo mesmo que de la Universidá d’Uviéu y d’entidaes d’iniciativa social.
El plan s’estructura en cuatro grandes árees d’intervención: sociu-sanitaria, educación, empléu y ociu y tiempu llibre. Con él, el Principáu quier ameyorar l’atención y el bienestar, y favorecer la inclusión y participación de les persones con discapacidá en tolos ámbitos al traviés d’un ampliu paquete de midíes.
Díaz esplicó a los representantes del Cermi que’l Gobiernu asturianu ta trabayando na revisión del Plan d’Accesibilidá del Principáu, vixente dende 2011, que va tar terminada antes de finales d’añu, y anunció l’aprobación, nes próximes selmanes, de la Tarxeta Identificativa de Persones con Discapacidá. Esta tarxeta, que foi un pidimientu realizáu por el mesmu Cermi, va sirvir como carné identificativo y va sustituyir al actual certificáu en formatu papel, lo que va simplificar l’accesu a determinaos servicios como un trámite alministrativu o a la acreditación d’una discapacidá reconocida.