L’asturiana María Neira, directora de Salú Pública de la OMS, va ufiertar esti sábadu la conferencia inaugural del XLVI Congresu Nacional de la Sociedá Española de Nefrología. Esti sábadu tamién va intervenir como ponente nun cursu precongresual el doctor Fernando Cosío, tamién d’Asturies y que coordina’l plan de tresplante renal ente pacientes vivu na Clínica Mayu de Minnesota.
La sesión inaugural, que va tener llugar a les 19.00 hores nel Palaciu d’Esposiciones y Congresos de la ciudá uvieina, va cuntar cola participación de Neira, quien va ufiertar la conferencia ‘¿Son los nuevos oxetivos de Desenvolvimientu Sostenible una oportunidá pa la Salú Pública Global?’
Primeramente, nesta mesma xornada (ente les 15.00 y les 16.00 hores), va tener llugar otres dos intervenciones nel marcu d’un cursu precongresual: la del asturianu Fernando Cosío, que desenvuelve’l so llabor profesional na Clínica Mayu de Minnesota, y Federico Oppenheimer. Dambos van falar sobre los programes de tresplante renal de donante vivu.
El primeru va esponer la so esperiencia n’Estaos Xuníos, onde lidera esti tipu de proyectos, y el segundu va faer lo propio col programa español. Na xornada del domingu asocederán dalgunes de les ponencies de mayor interés d’esti alcuentru, qu’axunta a más de mil especialistes na capital asturiana.
El doctor Jorge Cannata, del Hospital Universitariu Central d’Asturies, va falar en Calcificación vascular, desmineralización y avieyamientu: un viaxe dende’l paciente a les molécules’ de los nexos ente calcificación vascular y desmineralización ósea, y les posibles víes sobre les que trabayar pa conocer, por casu, si les parés vasculares tienen mecanismos, al igual que’l güesu, pa resorber el güesu formáu que-y dexen evitar la progresión de les calcificaciones vasculares, un descubrimientu que tendría importantes. Esta intervención va tener llugar a les 13.30 hores.
Darréu, ente 15.30 y 17.00 hores, van presentase los primeres resultaos sobre una melecina creada pa tratar la poliquistosis renal autosómica dominante, una enfermedá d’orixe xenéticu caracterizada pola presencia de múltiples duviesos renales, y que los sos pacientes podríen evitar la diálisis o’l tresplante renal con tomar d’esti tratamientu a partir d’estadios tempranos.
El llunes celebrará la conferencia de Rafael Matesanz, director de la Organización Nacional de Tresplantes, na que va falar sobre donación y tresplante renal n’España.