La conseyera de Desenvolvimientu Rural y Recursos Naturales, María Jesús Álvarez, esixó güei a la ministra d’Agricultura, Alimentación y Mediu Ambiente, Isabel García Tejerina, que defenda “de forma contundente” nel próximu Conseyu de Ministros de la Unión Europea l’adopción de les midíes alcordaes la selmana pasada coles organizaciones agraries d’Asturies pa faer frente a la crisis de precios que traviesa’l sector lácteo.
Ante’l “estrueldosu fracasu” collecháu’l pasáu añu tantu pola Comisión Europea como pol Gobiernu de Rajoy col paquete d’actuaciones adoptaes, l’Executivu asturianu y los sindicatos agrarios consideren “imprescindible” l’adopción d’otres midíes pa regular el mercáu, ente les que figura la medría del preciu d’intervención per llitru de lleche, según manifestó Álvarez na xunta del Conseyu Consultivu de Política Agrícola p’Asuntos Europeos, celebrada güei en Madrid.
“Dalgunes d’estes propuestes yá les realizáramos en 2015, pero la Comisión Europea decidió aparcales y aplicar otres que nun consiguieron los oxetivos, porque la producción de lleche sigue creciendo en toa Europa, n’Asturies tamién, y los precios siguen baxando, col consiguiente perxuiciu pa los nuesos ganaderos”, apuntó la conseyera.
Amás del aumentu del preciu d’intervención, la titular de Desenvolvimientu Rural tamién reclamó al ministeriu que defenda la próxima selmana, na xunta del Conseyu de Ministros de la UE, la medría del control sobre la cadena de precios, l’ampliación de los volumes d’almacenamientu priváu y la busca de nuevos mercaos pa vender lleche. “Realicemos, amás, propuestes más novedoses, como la creación d’una prima adicional pa contener la producción mientres los precios sigan a la baxa”, amestó.
Per otra parte, Álvarez anunció que’l día 16 va constituyise la Mesa del Sector Lácteo d’Asturies, una iniciativa de la conseyería pa incorporar a tola cadena: ganaderos, industria y distribución. “Pretendemos establecer un escenariu de diálogu que dexe encetar oxetivos comunes y facilite el resolvimientu de los problemes pa llograr la pervivencia y sostenibilidá del sector n’Asturies”, esplicó la conseyera.