El Conseyu de Gobiernu autorizó la celebración de seis convenios de collaboración con otros tantos conceyos para’l sostenimientu de los recursos municipales adscritos a la rede de cases d’acoyida para muyeres víctimes de violencia de xéneru. Por aciu estos alcuerdos, Uviéu, Xixón y Avilés apurren fondos para’l financiamientu d’estos dispositivos por valor de 255.000 euros, ente que Llangréu, Valdés y Castrillón participen dexando l’usu de pisos tutelaos.
El Principáu destina cada añu 900.000 euros al caltenimientu de los dispositivos d’atención y acoyida a víctimes de violencia de xéneru al traviés d’un conveniu de collaboración con Cruz Roja Española que dexó atender a más de 6.000 muyeres dende l’añu 2000.
Anguaño, formen parte de la rede los siguientes recursos: el Centru d’Atención Integral a Muyeres o Casa Malva, en Xixón, que dispon de 30 apartamentos; la casa d’acoyida d’Uviéu, con 19 apartamentos; la casa d’acoyida d’Avilés, con 17 places, y 20 pisos tutelaos con capacidá para 80 unidaes familiares.
L’añu pasáu, el serviciu d’atención a ingresos y emerxencies de la rede asistió a 507 persones, de les que 261 yeren muyeres, el 52,26%, y 246 fíes y fíos.
Coles mesmes, en 2017 ingresaron 375 persones nos distintos recursos: 196 muyeres, 175 menores y 4 fíos mayores d’edá.