La Conseyería d’Economía y Empléu solicitó yá un informe a los servicios xurídicos sobre’l decretu llei aprobáu pol Conseyu de Ministros el pasáu vienres qu’esixe la delimitación de zones de gran arribación turística, nes que va haber llibertá d’horarios pal comerciu. El Principáu considera que la norma puede incurrir nuna invasión de competencies propies de la comunidá autónoma y plantégase, nel so casu, presentar un recursu ante’l Tribunal Constitucional.
El director xeneral de Comerciu y Turismu, Julio González Zapico, esplicó güei la postura del Gobiernu asturianu a los representantes del sector comercial, axuntaos na Mesa de Comerciu del Alcuerdu pal Empléu y el Progresu d’Asturies (AEPA), convocada con calter estraordinariu p’analizar la midida impulsada pol Executivu central.
González Zapico alvirtió de que’l Real Decreto-Llei d’Aprobación de Midíes Urxentes pa la Crecedera, la Competitividá y l’Eficiencia puede incurrir nuna inxerencia de competencies en materia de comerciu y amestó que tanto los sindicatos como los empresarios consideren que la postura del Principáu ye atinada.
“Tamos en manos de los distintos preseos que tien la comunidá autónoma pa judicializar esti asuntu y ellos van marcar los tiempos, pero tenemos de tener en cuenta que’l plazu pa interponer un recursu ante’l Tribunal Constitucional ye de tres meses y que disponemos de seis pa enllantar la norma”, precisó.