El conseyeru de Presidencia, Guillermo Martínez, señaló güei nel plenu de la Xunta Xeneral del Principáu d’Asturies qu’anguaño se llevaron a cabu nel Principáu 1.875 peritaciones xudiciales, de les que 947 fueron resueltes por personal propio de l’alministración, 904 por contratu de servicios y otres 24, dada la so especial complexidá, por axentes esternos. Martínez tamién esplicó qu’el 2,45% de les peritaciones realizaes son inmobiliaries, concretamente 46. D’elles, 30 fueron executaes por personal propio de l’alministración autonómica y 16 por contratu de servicios.
El titular de Presidencia respondió güei nel plenu de la Xunta a una entruga rellacionada col espediente de contratación del serviciu de peritaciones xudiciales. Nesti sentíu, indicó que’l Principáu axudicó’l serviciu’l 18 de noviembre de 2013 a la empresa Taxo Valoración S. L. El contratu, suscritu’l pasáu 31 d’avientu, sigue entá vixente y va ser prorrogáu.
A xuiciu del conseyeru, esti serviciu dexó dotar de más medios a l’alministración y entainar les peritaciones colos órganos xudiciales, una midida qu’adoptaron tamién otres autonomíes como Andalucía, Galicia o la Comunidad Valenciana cola mesma empresa. Amás, favoreció un aforru de 200.000 euros en comparanza col presupuestu de 2011.
Martínez tamién apuntó que, ante una solicitú de revisión d’oficiu del resolvimientu d’esti contratu per parte del Colexu Oficial d’Axentes de la Propiedá Inmobiliaria d’Asturies, que nun impugnó al so debíu tiempu los resolvimientos de llicitación y axudicación, la Conseyería de Presidencia dictó en septiembre un resolvimientu pa empecipiar el citáu procedimientu, col propósitu de determinar si procede la nulidá. Una vegada tramitáu l’espediente, el Principáu solicitó un informe sobre esti asuntu a los servicios xurídicos que concluyó que nun procede la revisión d’oficiu del resolvimientu d’axudicación a la empresa TAXO.
Sicasí, el titular de Presidencia precisó qu’una hipotética declaración de nulidá del contratu de peritaxe nun invalidaría en nengún casu les periciales practicaes. “Sía que non, afectaría al procedimientu alministrativu, non al procedimientu xurisdiccional; esto ye, la nulidá del contratu nun anularía la prueba”, destacó ..
Nesti sentíu, llamentó l’alarma xenerada poles declaraciones del diputáu popular José Agustín Cuervas-Mons, qu’ayeri alvirtió sobre la posible invalidación de procesos xudiciales si declara la nulidá del contratu cola empresa que xestiona’l serviciu de contratación de peritos destináu a la xusticia gratuita. Coles mesmes, desmintió les cifres facilitaes pol parllamentariu popular, que sollertaba sobre la posible invalidación d’unos 400 procesos xudiciales, y aportunó en qu’anguaño namá se realizaron 46 peritaciones inmobiliaries.
