La Conseyería d’Empléu, Industria y Turismu, al traviés de la Sociedá Pública de Xestión y Promoción Turística y Cultural del Principáu, participa nel Roadshow Destinazione Spagna 2018, un eventu itinerante con formatu comercial que percuerre a lo llargo d’esta selmana y hasta mañana xueves les ciudaes italianes de Roma, Florencia, Verona y Turín.
Asturies participa nesta acción, entamada por Turespaña, al pie de otres comunidaes autónomes coles mires d’amosar la so ufierta énte operadores turísticos italianos y favorecer la posibilidá d’algamar alcuerdos comerciales con empreses de la rexón.
Anque’l productu más demandáu polos turistes italianos ye sol y sablera, cada vez se combina más con otros allegaos a la ufierta asturiana, como’l turismu de ciudaes y les visites culturales.
Según los datos del Institutu Nacional d’Estadística, el turismu italianu n’Asturies aumentó un 35,8% de 2011 a 2016, una crecedera nel que la conexón aérea directa con esti país tuvo gran influencia. Na actualidá, Italia ye’l quintu mercáu internacional más importante pal Principáu y representa el 7,8% del turismu estranxeru que visita la comunidá.
La participación d’Asturies nesti eventu respuende al oxetivu del so internacionalización como destín definíu nel Programa de Turismu Sostenible de del Principáu d’Asturies 2020.