El Principáu impulsa la comercialización turística con axencies alemanes na feria ITB de Berlín

El director xeneral de Comerciu y Turismu, Julio González Zapico, participó nel actu d’inauguración de la feria turística ITB Berlín, na que’l Principáu va desenvolver una intensa axenda comercial con turoperadores y federaciones deportives hasta’l próximu domingu.

Mientres el certame, qu’axunta cada añu a 169.000 visitantes y más de 10.000 espositores, el Gobiernu d’Asturies tien previstes, ente otres, nueve xuntes con turoperadores alemanes como Olimar, Gebeco, Ikarus Tours, Bund-Reisen, Asturies & HolidayCheck y Alma Tourism Consulting, coles mires d’ameyorar la comercialización de los establecimientos asturianos.

Amás, la collaboración cola Federación de Monte Alemán DAV Summit Cluben dexó programar cuatro viaxes al Principáu, como destín de naturaleza, p’anguaño y el próximu. Esti alcuerdu ye resultáu de les acciones impulsaes pol Executivu autonómicu por cuenta de la apertura del vuelu de Volotea a Múnich en mayu de 2017.

La participación en ITB forma parte del plan de promoción turística nel mercáu internacional que punxo en marcha anguaño la Conseyería d’Empléu, Industria y Turismu y qu’arrincó en febreru en Múnich, cola asistencia a la feria d’ociu y viaxes más importante d’Alemaña del sur, The fair for travel and leisure, y la presentación d’Asturies como destín. La organización de viaxes de prensa y axencies, según diverses acciones de publicidá en medios de comunicación y redes sociales, completen les iniciatives previstes, centraes na promoción de la naturaleza, el turismu activu y el Camín de Santiago.

Alemaña constitúi’l segundu mercáu turísticu internacional pal Principáu, con más de 42.000 visitantes al añu, un 58% más qu’en 2012. El 12,6% de los turistes estranxeros que visiten la comunidá son alemanes.