La conseyera de Bienestar Social y Vivienda, Esther Díaz, señaló güei que los nuevos centros polivalentes de recursos (CPR) d’Establecimientos Residenciales pa Vieyos d’Asturies (ERA) que les sos obres tán bien avanzaes o a puntu de concluyir van tener una xestión pública. Díaz anunció que’l conseyu d’alministración del ERA, celebráu esta mañana, aprobó esta fórmula pa los CPR de Castrillón, Llastres, Cuideiru, Llangréu y Les Arriondes.
La titular de Bienestar Social esplicó que con esta midida defende’l modelu tradicional de xestión del organismu autónomu, que supon l’afitamientu y la crecedera del empléu públicu, al empar que l’ampliación de la rede residencial. Díaz indicó que l’apertura d’estos centros va suponer unos 175 empleos públicos y añedió que’l Gobiernu asturianu ta cumpliendo’l compromisu qu’adquirió al empiezu de llexislatura d’abrir los centros que taben terminaos, concluyir les obres de los proyectos empecipiaos y resolver los proyectos apexaos.
Respectu al CPR Palaciu de Villar de Castrillón, la conseyera anunció que va abrir nos primeros meses de 2015 y esclarió qu’esta apertura va facer de forma progresiva. Nuna primer fase, de les 120 places residenciales y 30 de centru del día coles que va cuntar el CPR, van poner en funcionamientu 40 xeriátriques y 15 de centru de día. Precisamente, güei remata’l plazu pa presentar ufiertes a la llicitación del equipamientu polo que nes próximes selmanes ta previstu que se produza l’axudicación del mesmu.
Per otru llau, nel conseyu d’alministración del ERA analizóse’l proyectu de construcción d’un CPR en Cangas, que va tener que revisase y afaese a la normativa vixente. La conseyera repitió que’l Gobiernu asturianu comprometióse colos vecinos de Cangas de Narcea a qu’esti equipamientu sía’l primeru de les nueves obres de construcción qu’asuma la ERA, pero pa ello tendrá de faer una revisión total del proyectu que dexe al conceyu y a la contorna cuntar con un equipamientu que satisfaiga la necesidá real de persones mayores y persones con dalgún tipu de discapacidá y afáigase a les posibilidaes d’inversión del organismu autónomu.