La conseyera de Agroganadería y Recursos Autóctonos del Principáu, María Jesús Álvarez, esixó güei al Ministeriu d’Agricultura, Alimentación y Mediu Ambiente que cumpla los alcuerdos de xunu pa l’aplicación de los pagos de la Política Agrícola Común (PAC), nos que se favorecíen les ganaderíes, tantu de lleche como de carne, que desenvuelven la so actividá en zones de monte.
María Jesús Álvarez, que s’axuntó esta mañana colos representantes de les organizaciones agraries UCA, ASAJA y COAG, anunció la presentación d’allegamientos al proyectu de real decretu presentáu por ministra Isabel García Tejerina, que perxudica gravemente la ganadería asturiana.
Según recuerda la conseyera, nos documentos que remanaba’l ministeriu en xunu primábense les ganaderíes que desenvuelven la so actividá en zones de monte, tantu de lleche como de carne, nes cantidaes que se recibíen nos pagos acoplaos. Por ello, el trabayu desenvueltu mientres un añu, con alcuerdos nos grupos d’altu nivel, nes sectoriales y nes xuntes billaterales “danos abondos argumentos como para agora pidir que se recupere aquello que taba faláu, alcordáu y que tenía amás el refrendo del propiu ministeriu”.
Álvarez esplicó que los reglamentos europeos establecen esa prioridá pa les zones de monte y que tamién la Constitución española recueye les característiques singulares de los territorios de monte. “Por eso creemos qu’el nuesu planteamientu ye coherente, xustu y que ye lo único que garantiza que se caltenga un nivel d’ayudes similar al del períodu pasáu no que tien que ver col saldu final de los pagos de la primer pilastra de la PAC p’Asturies”, declaró.