Connect with us

Noticies

El HUCA crea una Unidá d’Enfermedaes Neuromusculares

Publicado

el

HUCAL’Hospital Universitariu Central d’Asturies (HUCA) constituyó una Unidá Funcional d’Enfermedaes Neuromusculares cola que pretende dase una respuesta de mayor calidá a unes dolencies qu’afecten a unes 1.600 persones nel Principáu.

El conseyeru de Sanidá, Francisco del Bustu, acompañó esti martes a los representantes de les asociaciones rellacionaes con estes enfermedaes na presentación d’esta unidá, venceyada a la área de Neurociencies del HUCA, pero que engloba la participación multidisciplinar d’especialistes de siquier otres 15 disciplines médiques y cuenta con múltiples sofitos de personal sanitario non facultativu.

El términu enfermedá neuromuscular engloba más de 150 dolencies que pueden afectar al músculu, el nerviu o la unión neuromuscular, según informa’l Principáu en nota de prensa. La so característica común ye la perda de fuerza que, en dellos casos, puede apaecer asociada a un amenorgamientu sensitivu y, en menor midida, a una disfunción autonómica. En munchos casos, acarreta la perda de la capacidá funcional pa encarar xeres cotidianes.

Les sos característiques impliquen que munches de les persones afectaes riquen consultes médiques periódiques y cuidos continuos qu’han d’afaese progresivamente a la perda de la capacidá funcional y qu’anicien un altu costu familiar, social y sanitariu.

La nueva área del HUCA pretende dar una respuesta más fayadiza a esta variedá d’enfermedaes, a la complexidá del so diagnósticu, a la diversidá de la so evolución y el so pronósticu, a les distintes manifestaciones clíniques y a les rápides meyores científiques y técnicos.

Amás, va dexar amenorgar el númberu de pacientes que se víen obligaos a movese a otres comunidaes autónomes pa recibir tratamientu por cuenta de qu’Asturies escarecía d’una unidá de referencia autonómica.

L’equipu multidisciplinar del complexu hospitalariu va tar formáu por profesionales de neuroloxía, neuropediatría, neurofisiología, radioloxía, anatomía patolóxica, xenética, rehabilitación, neumoloxía, nutrición, cardioloxía, foniatría y ciruxía plástica.

Ente les primeres midíes que se van poner en marcha figura la creación d’una consulta monográfica de la enfermedá neuromuscular, cinco díes a la selmana, na que se va realizar l’atención y el siguimientu clínicu de los pacientes y l’establecimientu d’un circuitu preferente pa les pruebes diagnósticas precises, col fin d’entainar los diagnósticos.

Tamién se preve instaurar un circuitu axilosu de derivación a otres especialidaes y ameyorar la relación cola atención primaria pa resolver problemes como les derivaciones hospitalaries.

 

 

Advertisement

LO MÁS VISTO !!