La Conseyería de Desenvolvimientu Rural y Recursos Naturales va abonar a los ganaderos asturianos a finales d’esta selmana un anticipu del 70% de les ayudes de nodriza y vacunu de lleche de la Política Agrícola Común (PAC), lo que supon un total 13.664.094 euros partíos ente 6.935 beneficiarios, según anunció güei n’Onís la titular d’esti departamentu, María Jesús Álvarez.
D’esta cantidá, 6.952.049 euros correspuenden a subvenciones a nodriza, que se van partir ente 5036 ganaderos, y otros 6.712.044 euros van llegar a 1.899 beneficiarios de les ayudes de vacunu de lleche. La responsable de Desenvolvimientu Rural señaló que’l restu de les ayudes de la PAC, hasta algamar los 63 millones, va pagar en payares.
Álvarez, qu’asistió al 38º Certame del Quesu de Gamonéu y la XIV Feria de los Picos d’Europa, esplicó qu’anguaño la conseyería adelantró’l pagu y eleváu el so porcentaxe, qu’hasta agora yera del 50%, “porque la Comisión Europea asina la hai dexáu de resultes de la seca”. Anque n’Asturies nun se produció esti problema, dende’l Gobiernu del Principáu “trabayemos por que los nuesos ganaderos reciban l’adelantu y puedan competir asina n’igualdá de condiciones colos d’otros territorios”, amestó la conseyera.
Per otra parte, Álvarez resaltó la “importante medría”, un 40%, qu’esperimentó nos postreros cinco años la producción de quesu Gamonéu nes sos dos variedaes, la del puertu y la del valle, “xuna de les especialidaes queseres más singulares y valoraes de la nuesa comunidá autónoma”.
La titular de Desenvolvimientu Rural emponderó’l trabayu de los profesionales del Gamonéu, ganaderos y queseros, “porque acaldía faen bien el so trabayu pa poner a la nuesa disposición esti manxar” que, en 2016 algamó xuna producción de 132.000 quilos, con un valor de mercáu de dos millones.