La Conseyería d’Educación y Cultura entama una esposición sol nome de Voces. La llingua n’Asturies al traviés de los sieglos, nel marcu del programa « Cuadonga Centenarios ». D’esta manera, la llingua asturiana va tar tamién presente nel programa d’eventos tan ampliu y variáu que’l Gobiernu vien desenvolviendo nel 2018 pa celebrar los trés acontecimientos d’escepcional interés históricu que tienen l’epicentru nel Real Sitiu de Cuadonga.
Asina, enllazando coles actividaes destinaes a conmemorar el XIII Centenariu de los oríxenes del Reinu d’Asturies, la Conseyería d’Educación y Cultura entamó esta esposición, que se va inaugurar nel Muséu Arqueolóxicu d’Asturies el miércoles 26 de setiembre y va poder visitase hasta’l 14 d’ochobre. Va poder accedese a los sos conteníos, amás de n’asturianu, en castellanu y inglés pente medies de códigos QR, mesmo qu’al catálogu xeneral de la esposición.
Un equipu de profesores de la Universidá d’Uviéu, dirixíu por Xulio Viejo Fernández, encargóse d’ellaborar los conteníos d’esta muestra, cola que quier sacase a la lluz la trayectoria, interesante y llarga, d’una llingua con más de mil años d’historia, percorriendo les sos distintes etapes y analizando les cuestiones qu’en cada sector marcaron el so pasáu y presente y proyecten el so futuru nel sieglu XXI.
La rellación del asturianu coles llingües indoeuropees y romániques, l’apaición de los primeros documentos nos que se menta l’asturianu como llingua oral tradicional y propia de la xente d’esti territoriu, los primeros documentos n’asturianu, el desenvolvimientu de la so lliteratura, la minorización o los movimientos sociales pa la so recuperación y revitalización tienen acoyida nos materiales d’esta esposición, onde s’otorgó gran importancia a los elementos gráficos y audiovisuales.