El conseyeru d’Educación y Cultura, Genaro Alonso, anunció güei qu’esti cursu va aumentar la ufierta n’ocho ciclo formativos p’afaer meyor la ufierta de Formación Profesional (FP) a les necesidaes actuales del sistema granible.
En concretu, en grau mediu van poner en marcha los d’Atención a persones en situación de dependencia (IES Cangas) y Servicios de restauración (IES Valle d’Ayer) y en grau cimeru va ufiertase Sistemes electrotécnicos y automáticos na modalidá a distancia (IES Fernández Vallín, de Xixón). Amás, dóblase la ufierta en grau cimeru de Mecatrónica (CIFP d’Avilés) y va doblase en grau mediu’l de Mecanizado (CIFP La Llaboral).
Tamién se crean trés nuevos ciclos formativos por tresformamientu, que son en grau mediu Carrocería (IES Elisa y Luis Villavil), Atención a persones en situación de dependencia (IES Valle de Turón) y en grau cimeru Desenvolvimientu d’aplicaciones multiplataforma (IES Monte Naranco).
Alonso participó güei na inauguración del cursu de Formación Profesional nel centru integráu d’Avilés, onde realizó un balance positivu del tercer programa de FP dual, que dexó aumentar les hores del alumnáu na empresa, al pasar de 380 a 1.000 hores, lo qu’ameyora la so cualificación y empleabilidá.
Nesti sentíu, señaló qu’el so departamentu trabaya yá na convocatoria del cuartu programa de FP dual, que va simplificar el procedimientu de xestión, col propósitu d’ampliar el númberu d’estudiantes d’estes enseñances, según los centros y empreses participantes.
Nel tercer programa de FP dual participaron 28 centros educativos, 265 alumnos y 169 empreses, y afectó a 69 ciclos formativos.
Per otra parte, el conseyeru indicó que, a falta de datos definitivos, la matrícula na Formación Profesional estabilizóse en redol a los 15.000 estudiantes, de los cualos 12.200 opten pela vía presencial y unos 2.800 cursen enseñances a distancia.
En total, Asturies cunta con una rede de 66 centros de FP que toma tola comunidá autónoma y qu’ufierten diez perfiles de FP Básica, 35 ciclos formativos de grau mediu y 54 de grau cimeru. Esti cursu ufiértense 338 grupos de primer cursu.