El Gobiernu d’Asturies empezó a ellaborar un plan de prevención de la ludopatía que va incluyir acciones y midíes específiques para lluchar contra les conductes adictives venceyaes al xuegu. De la redacción d’esti documentu, previstu na Llei del Principáu 6/2014, de 13 de xunu, de Xuegu y Apuestes, encárgase’l grupu de conductes adictives del Conseyu del Xuegu nel que participen les conseyeríes de Presidencia y Participación Ciudadana, Educación y Cultura y Sanidá, el Conseyu de la Mocedá, les empreses del sector y l’Asociación Ludópatas Acomuñaos en Rehabilitación (Larpa).
Los miembros del grupu de trabayu van poner de mancomún les sos propuestes ya iniciatives en materia de xuegu patolóxicu, según los distintos programes y acciones qu’anguaño se desenvuelven na comunidá para actuar sobro la ludopatía ya incentivar actividaes d’ociu responsable. L’oxetivu del Executivu ye presentar el documentu definitivu nel primer trimestre de 2018, según anunció esta mañana la directora xeneral d’Interior, Pilar Alonso, mientres la celebración en Madrid d’una sesión de trabayu sobro xuegu responsable coincidente con una xunta del Conseyu de Polítiques del Xuegu.
El plan de prevención va incluyir, ente otros aspeutos, acciones nos ámbitos educativu y sanitariu y de prevención del xuegu en menores, según el refuerzu de les actividaes qu’anguaño desenvuelven el Serviciu del Xuegu y l’Unidá del Xuegu en materia de control y siguimientu d’esta actividá d’ociu.
L’Estudiu d’Evaluación del Impactu del Xuegu Patolóxicu n’Asturies, realizáu pol grupu d’investigación en conductes adictives del Departamentu de Psicoloxía de la Universidá d’Uviéu, va ser unu de los referentes pa los trabayos de redacción del plan.
El Principáu ye la única comunidá, xuntu con Aragón, que dispon d’una Llei del Xuegu que contempla la obligatoriedá de cuntar con un plan de prevención de la ludopatía. Pela so parte, el País Vascu, pioneru na llucha contra esta patoloxía, dispon d’un programa sobro adicciones al xuegu.
Con esti documentu, el Gobiernu autonómicu non yá perfecciona y consolida el marcu xurídicu al desenvolver les directrices de la llei, sinón que tamién da cumplimientu al so compromisu d’ellaborar el plan a lo llargo d’esta llexislatura.
En materia de prevención, el Gobiernu d’Asturies tien previstu tamién ellaborar, en collaboración cola Fiscalía de Menores, la Unidá del Xuegu y el Conseyu de la Mocedá, ente otres entidaes, un protocolu de coordinación p’actuar en casos nos que se detecte la presencia de menores d’edá n’establecimientos de xuegos y apuestes. Coles mesmes, va entamar la tercer xornada monográfica sobro xuegu responsable nel primer trimestre de 2018.