Connect with us

Noticies

Aprobada la toponimia oficial de los conceyos de Valdés y Santu Adrianu

Publicado

el

PrincipadoEl Boletín Oficial del Principáu d’Asturies (BOPA) publicó apocayá los decretos 77/2014 y 78/2014, de 5 d’agostu, polos que se determinen los topónimos oficiales de los conceyos de Valdés y Santu Adrianu. Cola entrada en vixencia d’estos decretos son yá 53 los conceyos asturianos qu’oficializaron la so toponimia.

Los procesos de normalización y oficialización toponímica son comunes a toa España y tienen que ver col desenvolvimientu de les instituciones democrátiques nel nuestru país y la considerancia creciente de la toponimia como parte del patrimoniu cultural inmaterial, según reconoció la ONU na so resolución IX/4, del añu 2007. N’Asturies empezaron los trabayos de normalización toponímica nel añu 2004, cola puesta en marcha de la Xunta Asesora de Toponimia y l’apertura d’espedientes d’oficialización de los nomes de llugar en diversos conceyos.

El procesu de revisión toponímica ye necesariamente llargu. Empecipia a pitición de los mesmos conceyos, y cuenta cola participación abierta de los partíos políticos con representación municipal, los colectivos de vecinos, les asociaciones de la zona, l’Academia de la Llingua Asturiana, el Real Institutu d’Estudios Asturianos y la Universidá d’Uviéu, mesmo que d’investigadores, encuestadores y espertos universitarios. Toos ellos collaboren nun procesu sistemáticu y rigorosu, trabayando, aldericando y revisando les formes toponímiques hasta algamar alcuerdos y soluciones de consensu.

De resultes d’esti trabayu conxuntu, desque en mayu del 2005 se publicaren nel Boletín Oficial del Principáu d’Asturies los primeros decretos d’oficialización toponímica, recuperáronse 16.565 topónimos tradicionales.

Advertisement

Es Noticia

LO MÁS VISTO !!