Connect with us

Noticies

Agroganadería afirma qu’Asturies ta cumpliendo la cuota láctea prevista

Publicado

el

vacasLa conseyera de Agroganadería y Recursos Autóctonos, María Jesús Álvarez, manifestó güei nel plenu de la Xunta Xeneral del Principáu que nun paez previsible qu’Asturies vaya a superar la cuota láctea asignada. “En principiu nun tenemos motivu pa pensar que podamos tener sobreproducción nin multa”, sorrayó. Asturies tien afitada una cuota láctea de 610.000 tonelaes al añu, más otres 20.000 tonelaes de la reserva nacional.

La conseyera indicó que quiciabes pueda devasase en dalgún casu puntual, pero aportunó en que se tán estableciendo cesiones temporales de cuota que funcionen”. Por ello, añedió que, teniendo en cuenta esta situación y los parámetros que remana’l Ministeriu d’Agricultura, Alimentación y Mediu Ambiente, “nun tenemos motivu pa pensar nuna sobreproducción”.

María Jesús Álvarez destacó’l calter vulnerable y sensible” del sector ganaderu asturianu, que se desenvuelve en zones de monte y enfréntase a series dificultaes pa resultar competitivu en preciu.

La conseyera reconoció qu’anguaño se ta travesando una crisis de mercáu, “que más allá del problema d’Ucrania y Rusia tien que ver con una medría de la producción n’Europa col zarru del mercáu chinu”. Nesti sentíu, recordó que, “dende’l primer momentu”, el Gobiernu asturianu amosó la so esmolición ante la baxada de precios n’orixe nel sector lácteo pol vetu de la Federación Rusa a los productos europeos y esixó al Ministeriu d’Agricultura que tresllade a la Comisión Europea una batería de midíes urxentes pa desaniciar esa situación.

Ente eses actuaciones, la conseyera aportunó na necesidá de revisar a l’alza los precios d’intervención de productos como la mantequilla y la lleche en polvu “por que cubran, siquier, la materia primo y los costos de tresformamientu, una y bones los qu’esistentes son bien baxos”. Tamién señaló que se solicitó l’apertura de nuevos mercaos a terceros países y qu’haya restituciones a la esportación “pa consiguir que nel casu de qu’esos nuevos compradores tengan precios menores a los europeos puedan algamar precios similares a los qu’había na Unión Europea”.

Advertisement

LO MÁS VISTO !!