El Conseyu de Gobiernu dio lluz verde a la concesión de subvenciones a los conceyos asturianos por valor de 9.799.020 euros pa sofitar la contratación de 707 persones con cargu a los planes locales d’empléu. Con esta midida, l’Executivu autonómicu sigui impulsando iniciatives pa lluchar contra’l paru, unu de los sos oxetivos principales.
El Gobiernu del Principáu, al traviés de la Conseyería d’Economía y Empléu, va subvencionar a los conceyos con 13.860 euros per contratu. Siquier la metá del númberu mínimu de los contratos que tien de formalizar cada consistoriu va tener que faese con persones mayores de 45 años. Coles mesmes, va dase prioridá a les muyeres víctimes de la violencia de xéneru.
Amás, les persones desemplegaes contrataes nel marcu de los planes locales d’empléu tienen de cumplir dellos requisitos, ente ellos, llevar empadronaos en cualquier conceyu asturianu siquier tres meses nel momentu que publicóse la convocatoria y pertenecer al colectivu de paraos de llarga duración.
Los planes locales d’empléu van facilitar un puestu de trabayu a 707 paraos en 77 conceyos asturianos mientres un añu. L’oxetivu de la Conseyería d’Economía y Empléu ye que les persones contrataes empiecen a trabayar el próximu día 1 d’ochobre. El Conseyu de Gobiernu aprobó’l pasáu 4 de xunu la convocatoria de subvenciones, que se publicar nel Boletín Oficial del Principáu d’Asturies (BOPA) el 13 del mes pasáu.
L’ayuda que se va destinar anguaño a los conceyos asturianos pa sofitar la contratación de paraos va ser de 2.449.755 euros y l’añalidá de 2015 va ser de 7.349.265 euros.
L’añu pasáu, el Principáu impulsó una primer convocatoria de los planes locales de empelo nel mes de mayu, que facilitó la contratación de 1.313 paraos. L’importe de les subvenciones concedíes a conceyos foi de 18.970.224 euros.
Nel mes d’ochobre, Economía decidió reforzar los planes locales d’empléu con una nueva convocatoria. Nesa ocasión, favorecióse la contratación de 660 persones mientres cuatro meses. El valor de les ayudes concedíes a los consistorios asturianos nesa segunda convocatoria foi de 3.178.560 euros.