El director xeneral de Planificación Llingüística y Normalización, Fernando Padilla, presentó güei nuna rueda de prensa celebrada nel salón d’actos del Muséu Arqueolóxicu el plan de visites guiaes en llingua asturiana al muséu Arqueolóxicu, que’l so departamentu pon en marcha a partir d’esti mes d’avientu y que van continuar tol primer semestre del añu 2018.
Fernando Padilla destacó qu’esta acción englóbase nes midíes que la Conseyería vien faciendo pa promover l’usu de la llingua asturiana en tolos ámbitos, y que con ella búscase en concretu “averar a la población asturiana’l mundu del Arte y la Hestoria de la so tierra emplegando la llingua tradicional”.
Esta iniciativa, que yá s’experimentó l’añu pasáu con resultaos mui positivos, quier afitase “cola organización en tol primer semestre del 2018 de visites guiaes mensuales nel equipamientu museísticu del Principáu buscando diferentes itinerarios de conteníos”, indicó’l director xeneral.
Les visites van facese los vienres últimos de cada mes pa escolinos y escolines y los sábados últimos de mes pal públicu interesáu, de xineru a mayu. Nel casu de los meses d’avientu y xunu los díes van ser los que siguen: 18 y 19 d’avientu de 2017 y 15 de xunu de 2018, pa les visites escolares; y 23 d’avientu de 2017 y 16 de xunu de 2018, pa públicu interesáu. Más información y reserves nel teléfonu 985106741 o nel mail (splnormalizacion@asturias.org)