El conseyeru d’Infraestructures, Ordenación del Territoriu y Mediu Ambiente, Fernando Lastra, informó al alcalde de Morcín, Maximino García, de que les obres de saneamientu de la aglomeración Morcín-Alfilorios, na cuenca del ríu Morcín, con un presupuestu de 2.537.100 euros, van axudicase previsiblemente en payares.
L’actuación, que salió a llicitación en xunetu, va beneficiar directamente a 1.515 persones y va financiase en trés añalidaes: 230.000 euros anguaño, 997.100 en 2018 y 1,3 millones en 2019.
La cuenca del ríu Morcín recibe anguaño los arramaos d’agües residuales ensin depurar de los núcleos de población asitiaos en tol tramu y nes redoma alcuéntrase’l banzáu de Los Alfilorios, zona catalogada como sensible.
El proyectu, que cunta con un plazu d’execución de 23 meses, inclúi la construcción d’una rede de colectores de 6,3 kilómetros que va recoyer les agües residuales de les localidaes asitiaes na zona. Percorriendo’l trazáu en sentíu ascendente, el colector xeneral parte del núcleu de Santolaya de Morcín y remata en Busloñe. Les obres inclúin los siguientes tramos del colector xeneral: el primeru, asitiáu ente Santolaya y Les Vegues; el segundu, ente Les Vegues y l’estación depuradora de Raspiar, y el terceru, ente La Caleya y Busloñe.
Mientres la xunta celebrada na see de la conseyería, Lastra tamién comunicó al rexidor qu’el so departamentu yá sacó a llicitación la redacción del proyectu d’enanche y meyora de la carretera MO-1 (Santolaya- Busloñe), nel tramu ente El Regueru y Busloñe, por un importe de 79.842 euros. La previsión ye axudicar los trabayos a finales de mes, lo que va dexar tener el proyectu redactáu nel segundu trimestre de 2018.
Coles mesmes, reconoció la necesidá de que los presupuestos de 2018 recueyan los fondos necesarios pal arreglu de más de 8,2 kilómetros de la carretera MO-2 (Santolaya-El Campu-La Carrera) y recordó que yá s’axudicó un contratu menor, por un importe de 37.385 euros, pa reparar un fundimientu y el pavimentu en dellos puntos de la vía de Otura (MO-4).