La Xunta de Voceros alcordó esti llunes suprimir la sesión plenaria d’esti vienres y celebrar namá la del xueves de control al Gobiernu. La decisión cuntó cola postura en contra y les crítiques de los grupos parlamentarios de Podemos ya IX.
Al términu de la xunta de la Xunta de Voceros el socialista Fernando Lastra aseguraba a los medios que’l motivu de la supresión de la xornada d’orientación ye que’l PSOE «nun puede cuntar con tolos sos parllamentarios el vienres ante los compromisos derivaos de la sesión de investidura».
Esta decisión llevantó les crítiques de Podemos ya IX. El voceru de Podemos, Emilio Llión indicó que «Javier Fernández pasa más tiempu n’Asturies qu’en Madrid ya ironizó que «quiciabes busque xalé na Moraleja pa dexar el de Somió».
«Nun entendemos porque’l PSOE precisa suspender la sesión del vienres y creemos qu’hai que falar d’Asturies cuando correspuende», indicó Llión.
Dende IX, Gaspar Llamazares, indicó que suspender l’actividá plenaria del vienres ye una midida desproporcionada» y ello xúnese a que Javier Fernández sía incapaz de compatibilizar el so llabor de dar cunta ante la Cámara col so llabor a nivel estatal dende’l PSOE.
«Tamos convirtiendo al Parlamentu asturianu nun Parlamentu cautivo de la dinámica estatal. Ye comprensivu que pueda tar ausente’l presidente pero nun lo ye que los diputaos del PSOE abandonen el frente norte pa sumase a la guerra del sur», dixo Llamazares.
Pela so parte la vocera de Foru, Cristina Coto, manifestó que magar el so grupu nun punxo inconveniente a la supresión de la xornada del vienres, lo qu’esperen ye que yá la última ocasión na que se paraliza l’actividá parlamentaria asturiana de resultes de la situación nacional.
Dende’l PP, Mercedes Fernández, consideró xustificada esta supresión en función «de los intereses xenerales del país y del so gobernabilidad, y en función del papel que xuega non yá Javier Fernández como presidente de la xestora socialista sinón tamién otros miembros del grupu socialista».