La comisión d’investigación sobre’l casu Aquagest” celebró güei la so primer sesión tres la so constitución, na que s’aprobaron los primeros pidimientos de comparecencies, pa intentar esclariar “unu de los episodios más escuros de la xestión municipal”, según manifestó la presidenta de la comisión y vicealcaldesa d’Uviéu, Ana Taboada. En total, van ser llamaos a declarar, según alcordóse nesta primer xunta, 22 persones, ente responsables polítivos, funcionarios, representantes de la empresa o persones que participaron nos viaxes que tán siendo oxetu d’investigación xudicial.
Ente elles, tán los miembros de la xunta de gobiernu qu’alcordaron devolver a Tribugest (del grupu Aquagest y que xestionaba la xestión de tributos, col nome comercial de Xestión d’Ingresos) la fianza del contratu, magar qu’había informes que señalaben diversos incumplimientos per parte de la empresa. En concretu, alcordóse citar al ex alcalde, Gabino de Lorenzo, según a Agustín Iglesias Caunedo, Jaime Reinares ya Isabel Pérez-Espinosa.
Al respective de los funcionarios municipales qu’intervinieron na devolución de la fianza, va citar al interventor municipal y a persones que trabayaben en departamentos que tuvieron relación col contratu, como Tesorería. Tocantes a representantes de la empresa, aprobóse citar a Joaquín Fernández (consideráu nel sumariu xudicial l’abrelates” de la trama, o “algamador” de contratos públicos, y que fixo dellos viaxes en compañía del exalcalde Agustín Iglesias Caunedo), según a otres persones que participaron en dichos viaxes, como’l exconcejal xixonés Manuel Pecharromán.
Les primeres comparecencies tán previstes pal 17 d’ochobre, cuando se va citar a declarar a funcionarios, ente ellos al interventor municipal, José Luis González; a la xefa de Contratacióm, Julia Piñera, y a personal del serviciu de Tesorería.
Mientres la xunta, alcordóse sumar al espediente municipal la información sobre les actuaciones de la brigada de Vixilancia Aduanera y del xulgáu númberu 1 de Llugo que puedan ser relevantes pa esclariar el casu.