El Gobiernu d’Asturies ellaboró’l primer protocolu autonómicu para reforzar les midíes qu’eviten l’accesu de los menores a los xuegos d’azar y los apuestes. La iniciativa, pionera nel país, enceta los riesgos d’esti tipu de práctiques col propósitu de prevenir conductes adictives y contribuyir a que les entidaes y colectivos implicaos puedan ufiertar una respuesta coordinada y eficaz.
El Protocolu de menores en materia de xuegu y apuestes va contribuyir a garantizar el cumplimientu de la normativa reguladora para frenar l’accesu de mozos qu’entá nun cumplieron la mayoría d’edá a los locales d’esti sector. Tamién afita los procedimientos de respuesta para favorecer la coordinación interinstitucional na intervención preventiva.
L’ámbitu d’aplicación de la guía se circunscribe namá a les práctiques realizaes de manera presencial.
Énte los potenciales riesgos pa los menores y l’esmolición espresada polos representantes del sector, el nuevu protocolu busca ameyorar la eficacia del conxuntu de profesionales que se dedica a esta actividá, lo mesmo que de les instituciones públiques y de les fuerces y cuerpos de seguridá, y garantizar, amás, la protección y atención de los mozos nes distintes situaciones que pueden producise.
Pa la ellaboración del documentu llevóse a cabu un analís previu de la población nueva d’Asturies y la so distribución xeográfica, y tamién xuna radiografía del sector del xuegu, col enfotu de determinar acciones específiques en función de la clasificación de los establecimientos por tipoloxía y sistemes de control.
El protocolu forma parte del plan de prevención de la ludopatía nel que trabaya’l Gobiernu d’Asturies y que se va presentar llueu. Los oxetivos de la guía son los siguientes:
– Recoyer de manera ordenada y sistemática les actuaciones pa la prevención del xuegu en menores d’edá.
– Empobinar y coordinar el trabayu de los profesionales y de los servicios de los ámbitos d’intervención implicaos: empreses operadores, policías locales y el Grupu d’Inspección del Xuegu del Principáu.
– Implicar a sectores sociales ya institucionales na intervención con menores de 18 años.
– Dar visibilidá al problema y sensibilizar a la población.
– Afitar criterios comunes d’intervención.
El conseyeru de Presidencia y Participación Ciudadana, Guillermo Martínez, espresó güei el so agradecimientu a toles entidaes que collaboraron na so ellaboración, “pola sensibilidá y l’esmolición amosaes pa faer frente de manera conxunta a un problemática que, más allá del cumplimientu de la normativa, esixe un verdaderu exerciciu de responsabilidá colectiva”, aseguró.
Al so xuiciu, el valor del protocolu anicia principalmente na manera en que s’enceta la protección de los menores por aciu una respuesta integral y coordinao, frutu del consensu y la reflexón de toles entidaes representaes nel Conseyu del Xuegu del Principáu: empreses operadores, alministraciones, sindicatos, asociaciones de consumidores y usuarios, el Conseyu de la Mocedá y el colectivu de xugadores con ludopatía en rehabilitación.
Asturies cunta con un Grupu d’Inspección del Xuegu integráu por cinco axentes de la Policía Nacional, adscritos al Principáu en virtú d’un conveniu de collaboración col Ministeriu del Interior, que son los encargaos de xixilar el cumplimientu de la normativa en materia de xuegu y apuestes. Pa reforzar el so llabor, el Gobiernu autonómicu peracaba un nuevu plan inspector qu’enceta la realidá actual del sector col fin de responder a les necesidaes de forma ordenada y sistemática.