El Principáu treslladó güei a les organizaciones sindicales la propuesta d’ufierta d’empléu públicu (OEP) de 2017, la más alta de los postreros quince años, con un total de 4.491 places. La propuesta va ser analizada’l día 12 nel marcu de la mesa xeneral de negociación, una vegada que yá foi aldericada y negociada colos sindicatos de cada ámbitu: Alministración xeneral, personal docente y estatutario.
El Gobiernu d’Asturies aprovecha con esta ufierta les posibilidaes que-y dexa la lexislación vixente, tantu no que se refier a la tasa de reposición -que va ser del 100% n’Educación y Sanidá, según en determinaos sectores de l’Alministración- como a la de estabilización, dirixida a amenorgar la temporalidá.
De les 4.491 places, 783 correspuenden a la cifra máxima dexada pola tasa de reposición, de les que 356 van ser para promoción interna de personal llaboral, afitaes según conveniu colectivu y acumulables a la vez llibre nel casu de que nun se cubrir. Otres 3.137 respuenden a la tasa de estabilización y 571 más van ser de promoción interna de funcionarios, personal docente y estatuariu, non acumulables a la vez llibre. Según la distribución por ámbitos, 767 pertenecen a l’Alministración xeneral, 2.416 a Sanidá y 1.308 a Educación.
Del total de puestos que se van convocar para l’Alministración xeneral, 351 van ser de nuevu ingresu y 416 acútense para promoción interna: 60 para’l personal funcionario y 356 para’l llaboral. Estes postreres, según fixa’l conveniu colectivu, van atropar a vez llibre si queden ensin cubrir. Nel casu de Sanidá, la vez llibre xube a 2.335 places y la promoción interna va ser de 81. Pela so parte, n’Educación la distribución va ser de 878 places para accesu llibre y 430 para promoción interna.
Una vegada analizada la propuesta na mesa xeneral de la próxima selmana, la OEP 2017 va ser aprobada pol Conseyu de Gobiernu.