El Gobiernu d’Asturies axudicó a la empresa Remana les obres de reforma de la see de la Conseyería d’Educación y Cultura, allugada na plaza d’España d’Uviéu. El presupuestu xube a 1.847.580 euros, partíos en trés añalidaes: 290.334 anguaño, 1.319.700 en 2018 y 237.546 en 2019. El plazu d’execución ye de 18 meses.
Los trabayos, que van empezar a principios de payares, tienen por finalidá ameyorar la seguridá y accesibilidá del inmueble, amás de favorecer la eficiencia enerxética. Para llograr estos oxetivos, va reforzase’l llume de les zones de camín, van esaniciase pasos y van asitiase barandielles afeches. Tamién se va construyir un nuevu ascensor, dende’l que se va aportar a la sesta planta, y van anovase los demás elevadores.
Amás, van instalase nuevos sistemes y equipos de protección contra’l fueu, lo qu’inclúi un espaciu d’abelugu para persones con movilidá amenorgada nos antepares de cada planta, y van asitiase puertes cortafuego.
A lo último, va sustituyise la caldera actual de gasoil por una de gas de condensación, lo que va dexar regular la temperatura al traviés de termostatos individuales para amenorgar el consumu enerxéticu y van camudase les ventanes. Coles mesmes, van anovase les lluces de toles plantes para instalar luminaria tipo LED.