El conseyeru d’Infraestructures, Ordenación del Territoriu y Mediu Ambiente, Fernando Lastra, presentó les actividaes conmemorativas del trenta aniversariu de la declaración del Parque Natural de Somiedu, el primer espaciu asturianu en recibir esta distinción en 1988, a la que se sumó, nel añu 2000, la de reserva de la biosfera.
Dientro del programa destaquen talleres abiertos a la ciudadanía y centraos na declaración del parque y la so repercusión socioeconómica nel conceyu. Amás, van entamase xornaes y congresos científicu-técnicos, esposiciones permanentes, concursos, festivales y visites al espaciu natural. Tamién se van editar publicaciones conmemorativas.
En concretu, planiáronse cuatro talleres. El primeru va treslladar a los asistentes la visión de l’Alministración autonómica al traviés del relatu de los distintos directores del parque. Nel segundu, tituláu El Parque Natural de Somiedu y l’Alministración local, alcaldes y conceyales d’estes trés décades van falar de la so esperiencia. Pela so parte, la sesión El Parque Natural de Somiedu vistu polos sos habitantes va sirvir por que los vecinos del conceyu dean la so visión sobro l’espaciu protexíu. A lo último, va haber un taller sobro igualdá, participación y dinamización, que va analizar la presencia de les muyeres nos órganos de xestión del parque natural y el so papel nel mundu rural.
A la presentación del programa asistieron el viceconseyeru de Mediu Ambiente, Benignu Fernández Fano; el director xeneral de Biodiversidá, Manuel Calvo; el director del Parque Natural de Somiedu, Luis Fernando Alonso, y l’alcalde del conceyu, Belarmino Fernández.