El plazu pa inscribise na Universidá Popular d’Uviéu abrirá esti llunes, y va permanecer habilitáu hasta’l 16 de setiembre. La Xunta de gobiernu del Conceyu d’Uviéu aprobó la pasada selmana l’adhesión d’Uviéu a la Rede Española d’Universidaes Populares, una propuesta impulsada pola conceyalía d’Educación.
Según informó’l Conceyu d’Uviéu al traviés d’una nota de prensa, l’oxetivu d’esta ufierta d’educación p’adultos, qu’empieza n’ochobre y va dir arriqueciendo les sos propuestes educatives, ye poner a disposición de tola ciudadanía d’Uviéu formación y cultura a menos de 10 euros el trimestre.
Empobináu a mayores de 16 años, aspira a «promover la participación social, la formación, la educación y cultura, p’ameyorar la calidá de vida de les persones y de la comunidá», según los estatutos de la Federación Española.
«Ye necesariu trabayar en rede y aprovechar la esperiencia d’otres ciudaes. Queremos que Popular Uvieín sía una universidá popular con una llarga vida, qu’arriqueza la vida cultural de la nuesa ciudá. Al traviés de Popular Uvieín vamos poner a disposición de la ciudadanía formación y cultura, con especial dedicación a colectivos como los mozos, les muyeres o persones mayores, anque la ufierta ta abierta a tola población», señaló la concejala de Participación ciudadana, Ana Taboada.
UFIERTA
Pal primer trimestre la ufierta educativa, dirixida a persones mayores de 16 años, ye de 23 actividaes formatives, de les que dolce son de nueva implantación y el restu correspuenden al programa d’educación p’adultos que yá desenvolvía’l Conceyu d’Uviéu.
La ufierta va anovar en xineru, onde se van incluyir cursos de divulgación científica, en collaboración cola Universidá d’Uviéu, de nutrición pa la salú o de montaxe cinematográficu, ente otres disciplines.
La Popular Uvieina va faer especial fincapié n’ufiertar actividaes nos barrios. Nel primer trimestre, van programase actividaes en Trubia y La Corredoria. En total, ufiertar nesti primer trimestre 1.258 places.