El 23 de marzu de 1998 aprobábase la Llei 1/1998 d’usu y promoción del bable/asturianu, estos díes cúmplense dos décades de la so puesta en marcha. Al rodiu d’esta efeméride la Conseyería d’Educación y Cultura, al traviés de la Dirección Xeneral de Planificación Llingüística y Normalización, entama’l llunes 19 de marzu una mesa de debate ente xuristes baxo’l títulu 20 años de la Llei d’Usu y Promoción del Asturianu.
Na mesa, moderada por Vicente Hoyo Montero, secretariu xeneral técnicu de la Conseyería d’Educación y Cultura, van participar como ponentes José Manuel Pérez Fernández, profesor titular de Derechu Alministrativu de la Universidá d’Uviéu, na actualidá lletráu del Tribunal Constitucional; Leopoldo Tolivar Alas, catedráticu de Derechu Alministrativu de la Universidá d’Uviéu; y Nicolás Bartolomé Pérez, abogáu y escritor, espertu en temes llingüísticu-llegales.
L’alderique, que se va celebrar a les 19:00 hores nel Salón de Té del Teatru Campoamor d’Uviéu, va tratar ente otros aspectos la evaluación de la Llei d’Usu como ferramienta de normalización llingüística, el marcu llegal del asturianu en comparanza col d’otres llingües, un analís del nivel de desenvolvimientu alcanzáu pola Llei nestos dos decenios, asina como les espectatives de futuru de la mesma.
Dempués de la esposición de los especialistes, va abrise una ronda d’entrugues ente’l públicu asistente.