La Conseyería de Cultura, Política Llingüística y Turismu va abrir el próximu martes les deliberaciones de los premios lliterarios n’asturianu col fallu del Alfonso Iglesias de cómic. El restu de los gallardones convocaos pola Dirección Xeneral de Política Llingüística van decidise a lo llargo de los trés próximos meses.
El xuráu del Premiu Alfonso Iglesias, que llega a la so 12 edición, va tar presidíu pol director xeneral de Política Llingüística, Antón García, y formáu pola escritora Mariluz Pontón, la profesora Tamara Collar, la dibuxante Raquel Llagartos, la historiadora del arte Mercedes Menéndez y el ceador Ruma Barbero, ganador de la última edición del galardón.
El premiu, que rinde homenaxe cola so denominación al popular ceador de Telva, Pinón y Pinín, cuenta na so nómina de ganadores con artistes como Isaac del Rivero, Javier Marinas, Alfonso Zapico, Enrique Carballeira, Luis Navazo, Alberto Vázquez y Anxelu González, amás de Ruma Barbero, que llogró’l premiu en trés ocasiones.
Tamién en septiembre, el día 23, va reunise’l xuráu del Premiu Xuan María Acebal de poesía. N’ochobre van fallase el Máximo Fuertes Acevedo d’ensayu, y el María Josefa Canellada de lliteratura infantil y xuvenil, los díes 7 y 21 respectivamente. Finalmente, el 11 de payares axuntaráse’l xuráu del Xosefa Xovellanos de novela. Tolos premios tán dotaos con 5.000 euros.