Nel marcu de la Selmana de les Lletres Asturianes, la Dirección Xeneral de Planificación Llingüística y Normalización y l’Institutu Asturianu de la Mocedá entamen Entaína a escribir. Segundu concursu de microrrellatos improvisaos n’asturianu pa la xente mozo.
Van poder participar quienes tengan ente 14 y 35 años d’edá y s’inscriban mandando un mail a cridj@asturias.org. Nesi corréu tendrán d’incluyir namás el so nome, dos apellíos y fecha de nacimientu. Les inscripciones van poder facese hasta’l 2 de mayu del 2017 a les 14.00 hores.
El concursu va consistir na ellaboración d’un microrrellatu nun tiempu máximu de 20 minutos, a partir del tema y indicaciones que’l xuráu dicte nel momentu d’empezar a escribir.
El concursu va desenvolvese na sala Borrón (cai Juan Benito Argüelles, 3, Uviéu) el día 9 de mayu del 2017, a partir de les 19.30 hores.
Toles persones participantes van recibir un llibru como regalu.
Van concedese tres premios (1., 2. y 3.), consistentes en llotes de llibros y discos. Amás, el ganador o ganadora va participar como xuráu nos premios Culturaquí 2017 que convoca l´Instituto Asturianu de la Mocedá. Otra manera, la Dirección Xeneral de Planificación Llingüística y Normalización va mirar pola promoción y divulgación de los microrrellatos ganadores y va poder incluyilos en publicaciones o antoloxíes qu’edite.