L’artista gráficu Alberto Vázquez García llevó la novena edición del Premiu «Alfonso Iglesias» de Cómic en llingua asturiana, que con una dotación de 3.000 euros concede la Conseyería d’Educación y Cultura del Principáu d’Asturies.
El xuráu encargáu de valorar les obres presentaes axuntó na mañana d’ayeri baxo la presidencia del director xeneral de Planificación Llingüística y Normalización, Fernando Padilla Palicio, y tuvo formáu pol artista plásticu y fotógrafu Luis García Iglesias, Luis Navazo, ganador de la edición pasada; Carolina González Rodríguez, autora de cómics; y José Antonio García Fernández, xefe del Serviciu de Planificación Llingüística y Normalización.
A esti gallardón podíen presentase cómics d’estilu, tratamientu y tema llibres, escritos en llingua asturiana y con una estensión mínima de cincuenta páxines siempre que fueren inéditos y non premiaos n’otros concursos, anque pa participar yera bastante presentar un proyectu inicial con una estensión mínima de quince páxines.
Ente les obres presentaes, el xuráu decidió, por unanimidá, conceder el Premiu al cómic tituláu Los llazos coloraos, destacando, como consta nel acta, «la estraordinaria ellaboración del guion y el trabayu eshaustivu d’investigación que construyen un retratu fiel de la posguerra n’Asturies». El testu presentóse col seudónimu «El argentino». N’abriendo la plica, l’autor ganador resultó ser Alberto Vázquez García.
Alberto Vázquez García ye un artista gráficu de trayectoria profesional dilatada. Trabayó como dibuxante pal diariu La Nueva España y el mediu dixital asturnews.com, y vien desenvolviendo una llabor destacada como diseñador de murales, cómics y cartelería pa delles ONX, como Soldepaz-Pachakuti, Médicos Mundi o Secretariado Gitano, ente más otres. Amás, ye autor de dellos trabayos documentales de traza memorialista, ente los que pueden destacase 34-35, diez asturianos nel exiliu francés del añu 2011 y Poca ropa, la llucha contra la dictadura franquista en Mieres.